Piše Milan Rakovac
Danza macabra maestro!
(Pexels/Arhiva Glasa istre)
Naravno, Arminiove stope tamo više davno nije bilo, na Forumu, ali i Škiku se pričinilo da ju vidi, dok mu ju je did pokazivao grbljačon…
»Škik« je zaneseno slušao didovu priču; pred očima mu se slivao blak s poniženog mladića, u glavi mu tutnjali čavli odzvanjajući kroz pustu, gluhu, crnu, davnu puljsku noć; vijorio crni udovički veo mlađahne Elis, smrt čijega muža u Medačkoj operaciji morao on njoj dojaviti...
»Ča je črno to
ča noć prigrize,
črni brek u črnu jamu laje
u misec črno ča ga oblačno žere nebo,
’black is black’ e nero xe nero,
črni tuš,
e’l orchestrina tutta in nero;
danza macabra maestro!
Vincenco Kastavski dišenjiva nan put
u Svetoj Mariji na Škrilinah;
a ja pomračena uma udvaram se Crnoj udovici;
ala čipni me ko si kapaca, hudoba črna«...
- Aj brižan, ter vero brižan otročić moj, aj, san ti lipo ja povida, za popa si ti učinjen, za maještra, ma ne za soldata, nevoljnik ter dižgracija didova, za škrivana ma ne za mitralju...
- A muči jedan bot, dide, daj, jušto mi je pisma došla, a ti kako nini popesina, samo me prekidaš i predikaš...
Luca se uznojena dogegala do oca i sina, križajući se i vajkajući:
- Aj brižna ja sirota, dva munjena u hiži imati, aj, ča san to sirota dočekala. Poditinjija otac, pomunjesa sssiiinn mmiii...
Luca »Madre badeša« bila je propjo nesrićna ženska, i bašta! Poštenija od svetice, ter vero zato su je ženetine z sela, pune invidije i oholosti, i zdile šoranome. Dižgracija je iskala nju, ma i ona je dižgraciju na se zvala; ter ča ni, najliplja divojka u komunu, jedino dite u fameji, dote ubećane ka’j kraljica niena, se ubećala mižeriji ud šakreštana šepastega Zvane i ocu si Ivi sramotu načinila?
Ter ča ni svo zlato materino razdavala, to popesinon, to partizanon; aaaahlalaaa, su se hahizdale lajone po Komitetu, šporke samičine ča su za partizani došle u Istru, kada je hožievala, dižgracija od poštenja, Sekretaru svaka četiri lita, kako bi novega jizabrali, da, zdravo druže, da zdravo drugarice, da šta ste tribala? Da vero tote sve lipo piše da je drugarica ta i ta certa, ča san ja tote sprid tebe prežente, »dala za jačanje narodne valute pet (5) komada zlatnog nakita, jedan prsten vinčani - komada jedan; jedne špenjule šat su kako tobože naušnice - komada dva; jednu narukvicu - komada jedan; jednu kadinu šta je po hrvacki lančić - komada jedan sveukupne težine 377,40 grama, što će imenovanoj drugarici biti vraćeno daton prilikon SF-SN«;
- A da šta ti drugarica kako jena svjesna ženska ne biš popu pitala svoje zlato???
- Ma da vero ti druže gledaj našu Partiju, Bog je pomilova ča je fašište stirala ća, samo ča je čuda gnjusi svejeno ustalo, a crikvu ne tiči, to san ja crikvi dobre volje dala, ma vero i Partiji, samo ča san Partiji posudila i sad bin da mi tornaš...
Ter ča ni pošla služiti u Pulu poli žene fašištona maještra u selu da bi fameju prihranila, pak nazda rekla drugovima da ča je rabilo maještra tega regnicola Adeodata u jamu hitati ki da je bija pravi čovik, pa su za plaću deboto i nju, i zajno je vrgli za narodnu reahciju i skupa s tin nevuoljnin šakreštanom njejin za nenarodne elemente ča gaje sitnosopstveničke odnose i kulaštvo itd?
Pak ter ča ni finta u partizane pošla za infermjeru, samo da je muža ne tiču šepastega i za plaću je nisu dali boračku ki ni stila zemlju u zadrugu dati, pak su je zatrli z števuron i maltratali pak je pošla u Pulu ruzinu po brodi tuči u Uljanik, i ala muž mona jopet zvoniti i limozinu u crikvi brati; banda ter reahcija su rekli drugovi ča kako partizanka svjesno i tačno namerno malega krizma i bršnova i truje tako mladi naraštaj; i pak nazda jopet pena je priko ‘dovice tega majšetra ča su ga je naši u jamu hitili, a ona kad je hodila ća dala Luci svoju hižicu na Monte Grande, ča je po našu Veli Vrh, z lipin vrtlićon ča je je pomoga fameju zgojiti ki bi sijala i sadila sve čisto u njen; ‘lora komoč i kum pena da je tega malega Jivu »Škika« dala u Trst u dježuvite ki u Puli ga ni stila ni partija ni crikva, pak je šturlo tamo kažin načinija, i nikad nienu školu finija, nego samo grežieva po kantuni z sebi podobnima malviventi ča su po tih gitarah grebli i niku tošiganu travu fumali...
*Nastavak u sljedećem broju
