Naša beseda
Nada Galant: "Učuvat našo besedo moremo ku guorimo, ku nas ni sran guorit po naše"
Nada Galant (Arhiva Glasa Istre)
Ono ča valja se čuva tako da se prenaša z jenega na drugo pokoljenje. Čuda puti i samo povidajuć, a nike pute se i zapiše nike stvari. Jeno od mesti kadi se to najveć vidi je knjižnica. U njoj nike pute delaju ljudi ki ne samo da vole čitat, nego i pisat, a od njih niki i prevode. Mi smo veseli da u Žminju imamo jenu takovu peršonu.
Nadu Galant ćemo upoznat – malo ono ča je bilo, malo ono ča je, a i ono ča se, kako njoj je i ime, špera da će se zgodit. Da bimo je mogli upoznat, našli smo se jušto mrž libri – u žminjskoj Knjižnici. Poćakulali smo o libri, jeziku, ali i temu ča će delat za deset let, aš je pomalo čeka i penzija. Tako da je ovo i jedan rezime dela i života dosad.
Vi tu imate čuda libri. Ča čitaju mladi, a ča oni manje mladi? Kako van je delat u jenoj maloj sredini u koj znate deboto svakega po imenu?
- Naši korisniki išćo libri ki so popularni, najveć se čitajo libri za upučinut: krimići i ljubići. Mež svemi našemi čitači, neki čitajo po neken sisteme nešto ča so propuštili, neki samo libri z hrvatske književnosti… Nekakor mi se para da je pa intereš za libri z psihologiji i da se jako gambijeva z leta va leto ča se čita. Mlade smo zgubili nihde va te trke za čitačima, tu i tamo se zalašći neka iznimka. Čitajo lektiro i ku imajo slobodan izbor ono ča je tanje. I to je to. Neki od teh se potle tornajo i potle čuda čitajo. Malo mi ih je teško savjetovat aš oniput rada na me prehito ku in se neki libar ne pieža. A kat mlade provievan namurat na neki liepi libar, a oni vajk zbero oni tanji, pak se ja povučen. Liepo mi je delat z ljudi keh deboto svakega poznan, kad dobijemo novi libri npr. već va glave slažen ča će bit za kega i veselin se ponapred. Bit dobar knjižničar je jenako teško kako i bit dobar šlovek i kolikogot se šlovek trudi vajka more bolje.
Učuvat našo besedo moremo ku guorimo, ku nas ni sran guorit po naše
San ču govorit da je čovik ono ča pensa i govori i dela. Jeno selo govori po svoje, drugo po svoje... će li se za 100 let govorit kako i danas? Kako očuvat domaću besidu?
- Učuvat našo besedo moremo ku guorimo, ku nas ni sran guorit po naše. A kolikogot se mi trudili okoli našega zajika, uon se gambijeva, i to ne vajk na slabo, mu se dogaja i sve ono ča ne bimo rada. Gube se i zabljievajo neke besedi, govor umehčievamo i guorimo se već po hrvatski ali koristimo besedi z nekega drugega dijalekta ka je bliži hrvackemu da nas se bolje kapi, a ni mi nismo ciepljeni na englieški zajik kega je sagdere i onda ćemo rada npr. za neko našo butiego nać ingleško ime. Na to se je zdavni jadi i Črnja. Sada se to malo gambijeva pak nas liepo iznenadi npr. neko ime benda kako ča je Veja, Grrinta, Indivija, Paljarica… Telefuoni i kompjuteri ku ih koristimo kako rabi nan moru čuda pomoć. Moremo laglje napisat nešto, poviezat se z ljudi ki slično pensajo i na milijuon drugeh načini. Puno se dela na tien da se usčuva naša beseda, delajo to vrtići, školi, fakulteti. Puno je oneh ki pišo, puno se besedarniki dela i to je sve jako važno, aš po zajike smo to ča smo i zato je važno da se ne pohićevamo š njin.
Ni jušto besedarnik u pitanju, ma kako ste se našla delat z dr. sc. Nikolon Ljubešićen za čakavski korpus za kompjutersku lingvistiku, kako je Žminj doša u to?
- Do suradnji s dr.sc. Nikolon Ljubešićen ki dela na Institute Jožef Stefan va Ljubljane je prišlo slučajno, kako to buode. Njegova žena je porijeklon z Žminjšćini i nekako in je va ruoki priša Minji kraljić - Mali princ prehićen na žminjski. Kako se Nikola va svojien dele bavi z jezičnemi tehnologijami va keh so i veli jezični modeli, a za merit koliko oni dobro kape zajiki koriste neke posebne metodi, "merila", aš bi rabilo da kompjuteri kapo i dijalekti, a ne samo standardni zajik. Nikola bi bi rada va to stavit i žminjski, pa se je domisli na me. Za me je to bilo jako interešano i bi mi je veli gušt to provat. Kompjuteri so sve bolji za prepoznat dijalekti, ali se još muče z žminjsken. Ne mislin da je šlovek sluga kompjuteru, šlovek je stori kompjuter, a ne nuopak.
Kako se je rivalo nać vrimena za preves, ili, kako ste rekla, prehitit Malega Princa? Ča je tu pošlo glatko, a kadi se je oteglo?
- Ni mi rabilo čuda vremena za to storit, to mi je bi veli guš. Uglavnon mi je bilo lahko kako da samo prepiševan libar. Bilo je nekeh težeh stvari pa san pitala moji doma, gledala kako so to drugi storili. Nič se nisan mučila. Čitala san si naglas da čujen kako to zvuči, a i besedi kako ča so baobab tako va kumpanije drugeh besiet so mi oniput zgliedale zasien va riede, kako da so odjedanput i one žminjske. Neke stranice so mi bile malo teže, oniput san samo imela navar da ne zgubin ono važno ča je Exupéry tie reć. Neki put san zakomplicirala pak so mi rečenice bile čudne i teško se ih je kapilo. Takove san potle malo raskrosnala. Kad nisan mogla napret bin se domislila moje nuoni, kako bi ona to rekla. To je vajk pomoglo. Bila sam jako kuntienta kat san finila. To je bi baš liepi osjećaj.
Zgleda da Vi to volite. Pisala ste puno poezije i delala kako urednica u puno tega. Deboto sve je na dijalektu. Ča za vas znači pisat i, posebno, ča znači pisat onako kako se u Žminju govori? A ča tira ljude da slušaju i čitaju poeziju?
- Nešto san pisala, to mi je ustalo od minjega. Va Žminje se je održava, i još ja, Sabor čakavskega pjesništva i nas je naša profesorica Vilma Unukić muotila da pišemo, da se natječemo... i mi smo to rada delali. Svi smo pisali. I nastupali na Sabore i bili štuti kad smo dobili kakovo nagrado. Oniput so nagradi bile vele: bičikleta, kamere, foto aparat… to se pominjemo za ono vrieme pret pedesiet liet, kad ni bilo ni mobiteli, deboto ni televiziji, ni ničesera, pa je dobit bičikleto bilo vela stvar. I moj urednički rad, ku ga smien tako zvat, viežen je za Sabor. Prvi libar ki san uredila so bili čakavčići, mi tako zovemo svi zborniki dječjih radova vezanih za Sabor čakavskog pjesništva, kako ih je zva Črnja. Ti moji prvi čakavčići so se zvali I ošćenica ima dušo: čakavčići pieti i tela san da kumpare z onemi prvo ke je regula Josip Bratulić. Finilo je tako da se stranice nisu slagale i da je imie duple korice blave s črnen tiskon i biele z blaven tiskon. Potle mi je hodilo sve bolje. Štuta san na libri zavičajne biblioteki žminjskega vrtića Rapčići, na libar Dragana Gortana za kega smo dobili srebrno plaketo Matice hrvatske, na libar Josipa Šibarića z naše modruške Katedri Čakavskega sabora, ma na svi. Za me pisat znači moć reć ča ti je na duše, kat te nešto hiti z binarija, pa to moreš napisat oniput te to torna na mesto. A pišen na svojien zajike aš tako na svojien zajike i pensan i guš mi je te naše besedi videt na harte i čut ih kako zvonije. Ljudi kad čitajo ali poslušajo poezijo, oni ki ja, išćo neki mir tamo i mi se para kako da ih poezija malo stavi na mesto, munko mene ja.
I najzat sat san delavac va Čakavsken sabore
Bi reć da van i Čakavski sabor dosti znači. Zač je Čakavski sabor poče delat? Ča ste vi sve delala za Sabor?
- Čakavski sabor je bi zamišljen kako manifestacija ka bi imela stavit na onuor čakavsko pjesništvo, a potle je brzo prerasa va ono institucijo ka će ne samo učuvat nego i razvijat i tiendit sve ča je naše i sve ono po čien smo mi to ča smo. Mi smo kako dica pomogli otpočietka kako got smo mogli, smo kitili Žminj, smo liepili marki na pozivnice, smo miesili fuži za gosti, ča got so nan rekli i to rada. Potle smo nastupali, čitali svoje kanti ili recitirali, najveć i najraj pjesmi ot Črnji i Baloti. Pa kat smo narasli smo i sami organizirali Sabori čakavskega pjesništva, a to je značilo delat sve ot slaganja kandrieh do nać šoldi za sve ča nan je rabilo. I najzat sat san delavac va Čakavsken sabore.
Kako bite u par besidah povidala ča ste pasala dosad?
- Već san, zdavni, va letah kad poviedan ča je bilo jedan put, pak sigurno seh okoli sebe štufan. Rada se domišljan svojega ditinjstva, prieteli, moje nuoni i čuda ljudi keh već ni. I kako i svi domišljan se samo liepeh stvari i to je va riede aš se oniput one grde zabe. Imela san liepi život, liepo mladost, bilo je i jako grdeh momienti kako to zna život posložit. Iman pravo famejo i nučići. Delala san va Rovinje na Općine i va Žminje va knjižnice i va Čakavsken sabore, s pravemi ljudi. Čuda prieteli san stekla i to je ono najlepče i najvažneje va svien tien. Tu i tamo san se sretila z onemi ki delajo žgambeti, ma vrieme se poškrbi i za tisti. Puno put pensan da bi dobro da šlovek sebe i život ne ziema ni pre šerijo, ni pre na lahko ruoko. To je ono ča se je zgodilo.
A kako bi van zgleda plan za 10 let od danas?
- Va mojeh letah deset liet je čuda. Ku će Buoh ću uživat va penzije, ča pofinjevat, malo već bit doma i malo već ća, sadit ruožice, i tu i tamo ča napisat.
Teško je nać boljih besidah za finit intervju. Svako dobro želin! Hvala liepa i Van sako dobro!
Životopis
Nadino delo je u antologijah: "Istarska pjesmarica" od M. Strčić, "I ča i što i kaj" od B.Biletića, "Čakavsko pjesništvo XX. stoljeća" od M. Stojevića, u virtualnoj antologiji hrvatskega suvremenega pjesništva u redakciji Tomislava Marijana Bilosnića na portalu Akademije Art, u grafičko-pjesničkoj mapi "Istarski rukopisi – Calligrafie istriane" z Karlon Paliskon i u zborniki i časopisi.
Zat sebe ima i zbirke pjesmah: "Uroki ruok", "Hćeri Evine", "Ulaz u večernju svjetlost" (u suautorstvu), "Neka buo", "Uozlji d.o.o.", "Koluori, žuhko", "Prva sreda na mesecu" (u suautorstvu) i "Zuz zit". Nike od pjesmah su uglazbili Tamara Obrovac i Tomislav Uhlik i na pozornicu hi je zela Marija Kuhar Šoša. "Mali princ" od Antoinea de Saint-Exupéryja je u njenemu prevodu na žminjski "Minji kraljić".
Dva pute je dobila Međunarodnu nagradu Histria za dijalektalnu poeziju (2000. i 2004.). Ima i nagradu Općine Žminj (2007.), nagradu Drago Gervais za najbolje objavljeno književno djelo na nekom od idioma čakavskog narječja hrvatskog jezika za zbirku "Neka buo", nagradu Mate Balota za rukopis pjesničke zbirke "Uozlji d.o.o." (2010.), drugu nagrade za kratku priču Petar Miloš u Tomislavgradu (2024.) i nagradu za životno djelo Općine Žminj (2025.).
