Piše Milan Rakovac
Tri kolpa
(Arhiva Glasa Istre, Pexels)
Prethodni dio pročitajte ovdje.
Jadre je tiho cmizdrio tresući se od straha. Butiger Alfio Snidarsich uglas je molio, sad talijanski, sad hrvatski. Zatvorili su ih u podrum školske zgrade. Siora-Cici došla je sva u suzama jedne večeri, nutkajući Ivu svežnjem novčanica, svojom životnom ušteđevinom; jedva je nagovorio "Peresinu" da ju puste natrag u Grad. Butigerova žena kuhala je zarobljenicima. Nisu smjeli niti prošetati dvorištem. Dok jedne večeri nisu usopljeno nahrupili u selo neki uznojeni mladići prestravljenih očiju:
- Romelova ofenziva!!! Pale sve sprid sebe, čuda je mrtvnih... triba rasformirati jedinice i povući se prema Učki.
- A ča ćemo š njima? – Mahnu Ive bradom prema školi.
- Likvidirati!
Luca tiho krikne:
- Ma, druge Pere?!
- Drug Ive, vezuj, smjesta izvršenje!
Kad se je zaškurilo, "Peresina", Ive i una dva mlajuha su poveli une tri dižgracije van z sela, proti Jamurini, Lucu je otac stira doma, ma ona je šakreto svejeno hodila zad njih.
Krvavo kolo sira, misec se je ukaza crleno piturivajući ljudan ubraze. Su se pofrmali počinuti, "Peresina" je nažga, Ive potega tabaka u nos, su dali i veženin svaken svoj španjulet. Ive je ništo potiho govorija "Peresini", uvi njemu, gledala je Luca, maha z rukami sprid nosa... i Luci se je paralo sve to nikako kako nika deboto svieta slika, nu, kako da svietatrikralja griedu Isusa viti, eli, anci, kako kad su ona i njej utac jene takove noći se bili upravili na samanj valje u Vodnjan di su bili Rumenku mlikaricu ča hi je prihranila kupili.
- Nema to! Nemaaa! – dreknuo je odjednom "Peresina". Uzvik se prolomio kroz noć, niki ćuk se je zbudija, prenuja: huhuuuu, huhuuuu...huuuu, je šaptala drača na vitriću za njin... mrzli srhi lazili su Luci po trtici... je vidila kako se Ive ubraća i gre nazda proti selu, a "Peresina" gre naprid s tima ljudi. Se je stila Luca pokazati ocu, ga uzeti za ruku, poj š njin doma, ma kako nika črna ruka zgobljenih nohti je je ćapala za čriva, joh ma ča je bolilo... i je ustala tote ćupeći zad grma, kad je Ive črnega jaketuna još ud krigsmarine i bilega i crlenega lica spod misečine pasa poli da nju.
Je pošla naprid.
"Peresina" i una dva mladića su zrivali una tri brižnjaka na vrh stine poli sam Jamurinu... i prija nego je Luca mogla dojti bliže je čula tri kolpa, kako kada Ive bačvu nabija, jedan po bačvi, jedan po obruču, jedan po bačvi:
Pppammm, pamm, pammm...
Luca se je sva stresla ud febre gledajući kako se maještar, Jadre i buteiger pomalo, pomalo, pomalo spriginju jedan za drugin, ma pričižo vero kako u crikvi kada don–Luk prediku fini pak se seljani tiskaju kolo oltara da ki će to ča prija hostiju svietu progucati da bi njin grihi bili uprošćeni...
- Ma čaaaa!!! Aj prokleti da bite bili svi skupaaaa!!!
Je škikla u suzan siora-Cici. Luca se je puna srama vero lipo deboto razveselila, čujući prvi bot u svih tih lit svoju gospodaricu kako je kapaca vero lipo po našu. "Ma ne moren ja drugo h njoj, čako!", je plakala Luca, "Ko moreš, ko ne, MORAŠ! Jušto sad, zlo je učinjeno, i kristijan mora SAD"... je reka Ive potižući Lucu za sobon i jur zvoneći na Čičinih vrati. Čiči je nasmijana doprla vrata, Ive je rinuja prida se Lucu punu suz vajk vrtieći uni njegov prokleti klobučina mrež prsti kako da Boga moli. I tako su stali hip-dva, ma kako da je proteklo svo vrime ud svita postanja u ta dva hipa, kako kad bi se Ive smija Luci kada bi poželi pak vijajući šenicu na guvnu mrež prsti veselo poškika:
"Aj dajbognan šeničice,
šeničice biličice
za te naše utročićeeeee"...
- Ma čaaaa!!! Aj prokleti da bite bili svi skupaaaa!!!
Čiči je prikrižila ruke na prsi i zviknula prije nego je Ive to ča riva reći...
Sidili su potle mučeći uru-dvi, Ive je srka vodu, "prokleti da ste svi božji ljudi! A čako, ča to je delo kristijansko? Tobože vodu piti i zlo delati", je pensala Luca deboto mrzeći oca, nalivajući šjori-Čiči prst po prst rakije.
Zatim je Luca nosila gamele Ivi u puljski pržun... Luca plakala... smijenila sa položaja sekretara SKOJ-a Arminija i sama postala sekretar... i svaku večer da je ne bi kažo-maj, vidili compagni hodila šakreto po crikvan u Puli, paleći velike kandele za sve mrtve njeje, prvega maještra brižnega, i za živega si oca da ustane živ. Siora-Cici je pak pošla poli frau-baroneše, tobože, Eugenije Stirlitz von Graberje ča je sad držala kažin za niemške oficire i pak su vero Ivu puštili z pržuna, a stotine drugih naših svake noći su krgali na feratu i vozili hi to u koparski pržun, to u Coroneo eli Risiera San Sabo u Trstu, pak, se je govorilo, svragon na tudeške bande...
Zlo je došlo mrež ljude. Luca, mučna kako zmija kad meće staru košulju ća z sebe, je gledala oca si Ivu kako se cidi i žuti kako ‘j siri spod gredami na sirnici ča bi se debelili i bilili, pak kapali suze na pod, stiskali se u se, sve trži i sve škuriji; ma Ive je i bija jušto kako stari dobri sir, sve to grži ma sve to bolji, ča je huje bilo. Nosija je svoju pokoru muškardinski; nasika bi drvi za šjoru-Čiči, donija je šakučić muke a ona bi svaki bot samo zdahla i progucala suzu. Ni po seli ga nisu drugo marili...
*Nastavak u sljedećem broju
