Piše Milan Rakovac
O la... šanta domenika paša, domani že lunedi...
(DIMENSHTEYN)
Ive bi doša tobože noseći šinjori kakov sir, da bi je zahvalija za pjacer, ma sve na gušće potle ča mu je Luca bila napisala uno pismo, i još već videći je svu kuntentu u tih grajskih štračic. Je škrbija Ive za šćer, je, da je ne popade kakov latinski šinjorino punih usti zlata i meda; čuda muleši je ustajalo po naših seli. Da mu se dite ne privrže i udvrže ća ud njega i svojega svita; lip je Grad, lipo je živlienje kada se ne moraš ustati z petehi i leći kad se prvi bot ćuk uglasi, trudnih kosti i srca. Aj ča je naše mladetine Grad posrka, kako nieni lačni brek ča još i gamelu poliže i ne ustane nego sve prazno i suho za njin. Ter ki su bili najhuji proti narodne stvari ko ne sami naši šarenjaki, ime si krsno sami pridivajući da bi bili ča veći Talijani, kako ta Marachi, eli sirotina Jadre...
Bura šentimenti puhala je Ivi kroz prsa, kako ča sičnja drncaju i taranankaju žlipci na krovu spod refuli pak lipo švikulaju kad reful pasa; tako je Ivi srce i plakalo i kantalo. Želija je, da, neka Luca pur fini arat ud šarte - vajk to ki umre, to ki se uženi, to kega krste, vajk je to ča za ušiti magari i posrid sve mižerije ko ne drugo prikrojiti veštit za levu i pir i kad ti ga zadnji bot ubuču; dobar je grzunski arat, laglja je igla ud motike, ča?!
Pak, nu, i da si najde kakovega štabelega delavca ča ne mora škrban leći i još škrbniji se ustati vajk gledajući u nebo i vajk moleći Boga da ne bude suše i da ne bude grada i da bude dažda i da bude intrade i da ne budu velike števure i da boljpina kokoše ne požere i snit šenicu da ne pocika; delavac je deboto gospodin, delavac dojde doma za fabrike pak sina na jeno kolino i djornale na drugo, a težak je vajk huji nego nieno blago, vajk mučan, blatan, potriban svega čistega, vajk mučati i trpiti to sprid popa, to sprid financa, to sprid žandari i uvih sad mrskih karabinjeri ča kada suču monduru ubuču črnu košulju i baretu arabu i tursku i ala peštati nas Hrvate, tužna naša ura žalosna ča tužnija ni bila nikada ud kad smo simo došli bižeći sprid Turki ča njin se i sime zatrlo kako ča će, Buog daj, se zatrti i proklieto fašištičko sime latinsko.
I jušto zato, je dela kalkule Ive "Časantireka" vrtieći u rukah klobuk dokle je šjora-Čiči sva crlena ud veselja njušila par kobasic ča hi je bija donija, jušto zato ma ča pak ko se zagleda mi dite u kakovega dižgracjanega Šičilijanca ča su hi vero i domaći Talijani mrzili i hi zvali Afrikani. A ča paka, nazda, ko sprid pop-Luka jedan dan se stanu mala Luca sva u bilen ubučena i kakov nekrst ubučen u črnu svilenu košulju? Ter bolje da uženi suoga šakreštana "Šepu" pak na žuru, bobu i lazanj zgoji fameju, nego da pečene pulastre ima svaki dan ko ima nekrst fašištonski roditi i zgajati!!!
- Ma cossa i disi, sior Ive, che vien so de Iuoglsavia zerti?...
- Ma koša la vol šjora-Leticija ke ge digo mi, povero kontadin...
- Eeee, invesse, lei che la se tien ben col prete....
- Mi de politika no me intendo, kara šinjora.
- No so mi, no. Mio mari el disi che la sara bruta. Che xe gente che fa propaganda partigiana, de sti banditi che i ga butado una bomba l’altro giorno a Firume, e che anche a Pola i scrivi stupidagini per i muri...
- A ča ti Luce mala? Ča nimaš posla druderi? Uši su ti kako tovarove uresle?
- Ma čakoooo...
- E la lassi in pase, sior-Ive, sta povara creatura....
Ive je z obrvami Luci da mot, pobrla je sobon malega Bruna i pošla u drugu kamaru i legla ga kantajući mu: "cunci cunci na konje vuk ti majku zaokolje nemoj vuče moju majku meni majka draga cicu mi je dala i za sutra ubećala"... "cossa, cossa vol dir", "se parla de un piccio e de sua mammina", "ma cossa, cossa", "tasi e dormi", "ma cossa Lucia, cossa", "se disi al lupo de no magnarghe la mamina a questo fiol"...
Luca je slušala ćapivajući z kužine to kakovu besidu, ma čula bi samo "no, no, no manjo mi njente", brižan utac ter brižan, komoč bi ga šinjora priforcu činila sisti pak bi se sija na sam rub kantrige, altroke da bi ča pojija eli popija, pak ala daj mižo vode bi pita, aaa čako moj mili čako di ćemo mi finiti, ma ča vajk moraš biti tako ingordo; pak potle kada bi za nju se razminjali potiho malo ča bi čula, ko ne vajk svejene beside šjore-Čiči:
- Per l’amor di Dio, sior-Ive, lei la sa che mi ghe stago drio come che la fossi mia fia...
Pak bi utac ništo znjrčija kroz zube, pak jopet i vajk svejena još jedna pričiža šentenca:
- E che mal ghe xe se le putelle le va passegiar per i Giardini? Ma cossa le xe monache?!
Pak bi šjora-Čiči zvala Lucu neka pripravi EL TE, pak bi posidili svi čisti razminjući se kako da njin je došla una Tudeška, tobože konteša za koju je je mala Alma rekla da je držala kažin pod Austrijon, a ši, je rekla Luca ma ni znala ča je to kažin, pak kad je to povidala ocu, deboto da je zajno ni sobon poveja nazda na selo, komoč ga je šjora-Čiči kroz smih natentala da se smiri... I su lipo zvonili pjatini i ćikare ud fine porčelane, i hruskali biškoti spod zubi, ma Ive bi samo sidija vrteći ta bejati klobuk u ruk, a Luca samo čekala da reče:
- O la... šanta domenika paša, domani že lunedi...
I skin bi se leva ća, ala Alma i Luca lipo se prisući pak na Giardine, pak u Patinaggio slušati kako lipo sviri orkestrina i marinaji stišću zuza se ondulane šinjorine Puležane, pak ala u Cine "Pistola" viti po treti bot kako James Cagney ghe da fifa a tutti i gangsters de Chicago...
Ma valje, valje stvari su se počele jena za drugon mišati i kuhati; sve već mladići ča hi je i Luca poznala, kada bi je namigli na Giardini, priko noći bi pobrli u vojsku, a tako i po seli... i jopet su počele kartuline po gradu i po selu; iz Splita, Valone, Sevastopolja, Atene, pak jopet nazda službena pisma z timbron ud kralja ča su samo smrt nosila...
*Nastavak u sljedećem broju
Povezane vijesti
