Piše Milan Rakovac
Hudobe črne su imale lazno
(Pexels)
Čuda tega se je kambijalo potle te prve vuojske
Ma, Jugoslavija ni došla, nego vero Talijani pur ča nas na Soči nikad nisu dobili, i za niš su Ive i pop Luk po noći prija nego će dojti Talijani zavišali črne krpe po graži, tobože za žalost; za niš je Ive zabra narodnjake i čita njin u kamari z ponjavami zaškurenih okni pismo nike štute Kranjice Zofke Kvedrove da su rože ča su hi u Rapallu dali ženan jugoslavenskih prvaki crlena krv 650.000 Slovenci i Hrvati Julijske krajine; za niš se Ive prčija kantajući u svi glas na križini "Još Hrvacka ni propala dok mi živi smo"..., pak "Mi smo pak Jistrani, Hrvati pravi, kano lavi, ma kano lavi" pak su ga fašišti dobro udrsali z manganelli, pak nalili oljoderičino pak je pobra mlajuhe i hitija par tiri z "manliherke" na nje pak ala nazda u pržun; za niš se Ive prčija noseći po oštarijah sokolsko pero ki mu ga je uni pijančina Jadra "Boja" zgulija z jakete, nažga na kandeli i š njin španjulet da ve ro "znamo mi ben lipo ki njrsa ljude proti Rome", "ma ča ti prodanac ter mižerija, za škornje i košulju si se proda Latinon" i bofff Jadre žlepu Ivi nasrid oštarije "ja, Ive, iman za popiti i cilu oštariju platiti, a ti nimaš ni za dici kus kruha pripraviti": "a da tribe?", "anda da da ja!", "a kad si jušto toliki muškardin, ala se juštajmo ti i ja za jenu stvar, sior squadrista d’azzione!" "ala dajmo!", "ala slanih srdel bačvicu i dvi domijane vina platin za cilu oštariju! Iman na sebi hrvacku bandiru ja! Ako je najdeš, plaćan, ako je ne najdeš, plaćaš ti"...
Kapo ud fašišti se je usta i poša van, da on ga neće takova dela, "e cossa siamo omini o fioi?". Jadre je ubaša sve žepe na Ivi, po brnavrek, po jaketenu, po krožetu, popipa mu sve rube, činija ga zuti postole i bičve, finta mrež nogami ga popipa, jur nervož, ča mu se počinje smijati oštarija, pur i njegovi kumpanji fašišti. I je ni naša. Ive je zvadija z uha špenjulu starinsku, na bačvicu učinjenu, i na vidu zavidanu, razvida je i zgulija ž nje malu svilenu hrvacku bandiricu nutra zamotanu, i Jadre je mora platiti ča je zgubija.
Ma...
Lita su pasivala, i sve huje je bilo za naše ljude. Hudobe črne su imale lazno, i mrvile našega čovika kako ča kolo u malinu iz zrnja muku načini; trde števure, pak pozapirali naše Zadruge i Posujilnice, škole i čitaonice; pak da se ne smi po našu govoriti na javnih misti; pak talijanska imena priforcu naditi ljudan i mistan, pak dičinu nan po talijanski vaditi e "libro e moschetto fascista perfetto"; pak naši ljudi jedan za drugin na inkanat, certi biž priko kunfina, pop-Luka dva lita u konfinaciju valje na Lipare, i ljudi su došli štufi svega, i samo bi priko volje poslušali Ivu, ki su ga rišpetali, nu, kad bi njin povida je reka jedan da je ten pak povida niki drugi ča mu je brat u Zagrebu da se vero pisale naše novine da će Taliju vrag uzeti ko ne za Božić, paka sigurno za Vazan... i tako su pasivali Božići i Vazmi...
Sime na dug, pak končimu, pak dug za števuru platiti... i Ive je prodava kus po kus zemlje, intereši poli Džunte sve veći, i ča ni Ive Hrvatina mora prvi cediti na svu svoju sramotu i Lucu malu kad je finila la šešta klaše dati da služi maještrovu šinjoru u Puli i još mu to pripoznati i šinjor ši, i gracije šinjor maještro, kunući u sebi i sebe i njega i Mušolina i Goba Manuvela i Taliju, ma nikad, nikad tu prokletu Jugoslaviju ča bi sve na svitu za nju bija da, i vajk svejeno hodeći šakreto h pop-Luku čuti kad to će Italija finalmente propasti.
A propada je on sam i selo je propadalo i ljudi mučali i trpili i trpili i mučali i njemu ruku držali, ma po šakreto; ki nienomu se drugo ni hodilo na kvešturu dobre volje ričino popiti i još to koje rebro si puštiti slomiti.
Pak finta Luca mu srce slomila pišući mu pismo z Pule:
"Lipi moi ciacco ti pissen da san dobro i da mi je ciuda prava nassa signora i cia mi ni dala par lipich postoli sa te", kad je došla doma je činija Lucu sisti poli baró spod materinega litrata:
- Ča ni ona živa a ti umrla namisto nje, nesrićnice ter nevoljnice...
Mala Luca, ča, divojčinica ud trinajst lit, sva u suzami... Pak je prid njon pripisa njeju leteru z hrvackin slovin:
"Lipi moj čako ti pišen da san dobro i da mi je čuda prava naša šinjora i ča mi ni dala par lipih postoli za te"... aj ši, inutile... pak ala š njon h don–luku štiti "Pučki prijatelj" pak ala ona nabadati besidu po besidu žbaljajući svaku drugu, i ala Ive je uho potegnuti i ala pop-Luk mučeći motati z glavon i ala vero kuraja skupiti ta šepavi mlajuh ud zvonara, ki je rabilo trda jaja imati ki će Ivi "Časantireka" ništo dreto u brk povidati:
- A puš’te malu s miron, nu, ter ste pametan čovik!
- Ča ti šepe, a potiži konope i muči!
- A pomalo, pomalo, nu, ter smo kršćani... ala Luce hodi mi piplienje pogledati, nu... – se je jadija plovan.
- Gren, velečasni, gren...
Luca je u suzan se pobrala z šakrištije... Ive se je vero naprčija grišnik sprid Gospodina, ma pop skoči na noge svi crlen u licu i pokaže z prston Ivi da se ni pomaka z škanja:
- Ma ča si pamet pogubija, o Ive! Na dite svoje ruku vrći! Prizgrišno!... Teške su muke naše, ljudi moji, rabi čuda pameti i strpljenja, i samo z lipin Ive, samo z lipin se more uno grdo privrći, ma ne na silu, ma ne na silu...
*Nastavak u sljedećem broju
