(Arhiva Glasa Istre, Arhiva Novog lista)
Tanti auguri a te
Tanti auguri a te
Tanti auguri La Voce
E resta vox Histriae
Ma no xe gnanca tanto facile, po, restar e resister. Nove paure e novi esodi sveia ancha nel nostro corpus universalis nove xenophobiae e claustrophiliae. Al istrianesimo, pero, no esiston alternative. Scrivevo ultimamente che l’Italia, Croazia e Slovenia in Istria le xe debole – e per quel piu forti! La Voce e Glas i devi restar regionali e internassionali e multi-kulti e pluri-pluri, altrimenti semo fuch tutti quanti.
La Voce? Altroche! Mia mare vendeva giornai nel Centro stampa su i Giardini, inssieme con Mirella. Mama Duša legeva, c’o no ghe iera massa gente, la Voce del Istria (Glas Istre), e Mirella Glas naroda (la Voce del popolo). E le me legeva a mi, che gavevo sete anni, sia in croato, sia in ‘talian. E a volte ghe ne rubavo i fumetti, massa me piaseva FORZA JOHN...
Einzweidrei noi altri muli nostrani-domaci polesani de Drio La ‘Rena, nel 1947. gavemo fato un’ aleanssa istriana. Noi savevino do-tre parole in italian-polesan, lori una-o-do del croato-ciacavo. In un anno o due, noi ciacolavino con lori in istroveneto (polesan, po!), e lori con noi nella nostra lingua (che deso la xe – quattro lingue, dai, dai...).
E come mai? Perche ne dava fastidio quei vignudi de suso che i ne guardava "von oben", de suso, e che i se tegniva, "peste balcanica", come se i saria chissacossa. Digo aleanssa, e piutosto, se iera guai, se dava legnade a qualche sturlo, e ghe ne iera in abondanssa, de sturli, digo. E come scrivevan Iljf e Petrov, el nome regola el destin: se ti te ciami Orlov (Delaquila), te diventi dirigente d’orchestra, ma se el tuo cognome xe Vorobjov (Delpassero) ti te neghi a Stoja...
Per esser piu ciaro: se i tre fradei De Franceschi, del quartier, iera croati, e quattro sorelle e fradei Iskra italiani, tutto ciarissimo? O no?
Ma piu che ‘liati, ierino una squadra mobile e ingamba: se andava cavar granate 110mm (o quanti) dalle navi austriache che i nostri palombari le ga cavado suso, e se fasseva esplosioni nella ‘Rena e el guardian coreva drio de noi sigando bruta-mularia-mocolosa. E se cavava fora le losture a Fischer Huete e drento de ele mio fradel Živko e Adriano Iskra, massa boni artisti, i disegnava la ‘Rena, Porta Sergia, tempio d’Augusto, ma ance Mandrak e Forza John e Silvana Mangano: e i studenti del Željeznički tehnikum (scola per i feroviai de tutta la Jugo) i comprava ‘ste losture come mati. E dopo se ‘ndava pescar co’la togna, e de sera nel Blocco 7 guardar cinema che’l oriundo, go dismentica su’ nome, gaveva porta d’America tutto’l boxe con Joe Louis e Primo Carnera e Max Schmeling, piu el Topolino...
E se ‘ngrumava francoboli e se andava nel cinema e a rubar sisole e pomograna nei orti de Castagner e a Siana... Una vita bellissima...
E quando se incontremo ogidi, oramai vieci-stari (by Zanini) ciacolemo e ridemo e se battemo per le spale, ricordando come volevino tutti esser Nazi, giogando se a guera fascisti-antifascisti: perche l’unica roba autentica, iera un elmeto dei gnochi-nazi che lo gavevo trova nella cantina-rifugio nella nostra casa a via Gabriele Emo, piu un libro straordinario "Storia naturale del regno vegetale"...
La Voce del popolo, cio mio, Giacomo Scotti ‘riva de Fiume per scriver de mia mare, vedova partigiana, e mio fradel e mi. Cussi che mi, e no iero campion de calcio, ne sc’inche ne a far tufi a Valcane, ne a balignere - diventavo ganzo per i mii compagni. Bula storia.
Trent’anni dopo, Paolo Letis (polesan de nascita, e capo de La Voce) e mi (polesan d’adossion, e capo del Glas Istre) se saludavino a vicenda con: VIVA I NOSTRI, pero presto esitando – ma chi xe ‘desso i nostri, po, dopo la primavera croata? E SE SVEGLIA L’ISTRIANISMO, squasi sponteneamente...
Anni 70., torno in Istria dopo l’esilio voluto a Zagabria, Spalato, Belgrado, come se saria La ‘Merica; e me meto a scriver la storia nostrana-domacia: nel 1947. (mio nono Ive e pare Joakim copadi, loro soto terra e la tera in cooperativa) mia mare Duša, con due fii la va a Pola, incontremo per strada le corriere co’i ultimi esuli; iera tra lori anche Guido Miglia, Giorgio Depangher, Sergio Endrigo? La mia gente (by Miglia) 100%. Bambin che iero, come oddiavo ‘sta gente, lori gaveva copado i mii cari! E una muletta sul camion me rideva, a me ghe ridevo a ela, e subito la pianseva e poinasevo ancha mi con el: e go capi co’l anima infantile che semo the same fucking victims, lori e noi.
Un incontro casuale (o iera el destin?); xe capitado nel mio ufficio nel comun de Pola: grande giornalista Istrian, barba Ive Mihovilović, esule de Trieste, giornalista de Edinost, scampado ai squadristi, anni 20. per caso, iera ‘l 1975, capita de mi, e poco dopo anche Guido Miglia (lo go invita, iera una polemica tra noi, ghe scrivevo; no, i teremotadi e i esuli no xe la stessa cosa), esule scampado dai druxi: tra lori due esplode una polemicha spietada; iero solo un testimone blocado dalle loro tragedie. Ive e Guido da quel giorno diventassero amici per sempre; spero che la loro epistolaria esisti, ghe volessi publicarla...
*Nastavak u sljedećem broju