Riječ mladih: Ma kamo mi to gremo?

Kadi smo? Kamo gremo? Ča delamo? Kadi god se ubrneš se niki ništo žali kako mu je teško. Teško je kad ni dela, teško je kad je previše dela. Ma ča delamo? Nikad nan ni dobro. Mladi, stari, muški, ženske, svi se ništo žalimo cilo vrime, a kad se rabi čepati dela, svima je teško. I kad se i čepamo, malo ki da sve od sebe, ono 100 posto ča ima u sebi i ča more. Aj kad bi mo mi delali kako tuka, i po cile dane kako ča delaju samo parsto kilometri od nas, pa mi bi bili Amerika, i to ona od nikada, ne ova sada.

Ovaj vikend san bija u jenoj pokrajini u Italiji i znate ča san vidija tamo - svi ništo delaju. Po dva dela ko rabi. Svaka njiva je zorana, na svakoj njivi ništo reste, traktori ne stoje u garaži. A tek te male butige z domaćin proizvodima, ma sve ča se dela u okolici se prodaje i proda. Zašto? Jer ljudi ki žive tu kupuju te proizvode, jer znaju da tako pomoru i potiču ljude oko sebe. Tu su ljudi poduzetni, stvaraju, žbaljivaju, parte z početka, ali se muče i delaju. Forši bi mo se mi tribali ugledati na njih, a nisu nan tako daleko. I on ničega ča nan je prid noson napraviti ništo, jer niš ne dojde priko noći.

Ne postoje laki šoldi, nažalost. Ne triba pojti daleko, ima puno privatnika u Istri, koji se muče i delaju, žbaljivaju, padnu, dignu se i ne odustaju. Ugledajmo se na njih, pitajmo ih za savjet kako početi, kako nan takovi moru pomoći, a ne samo biti ljubomorni ča pelju dobra auta, gredu po svitu, na večere. Puno njih dela kako blago da bi si to moglo priuštiti. Oni nimaju Božića, Uskrsa, nedilje, oni delaju 24 ure, na njih djeluje zakon tržišta, a on je jako okrutan. A jopet imaju vrimena za fameju i za sebe. Svaki od njih zna za ča dela, oni nisu pasivni i ne žive stihijski. Njima lita ne pasivaju, oni sa sviton gredu naprid.

Movimo se svi skupa, movimo se naprid ako imamo niku ideju za proizvod, za neko delo, ne odustajmo, rivajmo naprid ! Imati ćemo 105 zapreka, ali pasati ćemo kroz sve njih. Iskoristimo Europske fondove, informirajmo se i uzmimo sve ono ča se nudi. Ni teško, ni komplicirano kako pensamo. Samo triba početi i ne odustati. Ne smimo biti promatrači vlastitega života i sudbine, tribamo koliko god moremo kontrolirati sve, učimo, educirajmo se, budimo aktivni u politiki i u poduzetništvu, jer samo tako ćemo ostvariti svoje ideje.

I zato van govorin još jedanput. Uzmimo sudbinu u svoje ruke, a prvi korak je da zajdemo na izbore. Glasajte za črne, bile, plave, zelene, live, desne, kope, špade, ni me briga za kega, samo zajdite i zaokružite nikega. Nemojmo iskati skužu za ne glasati, a pokle brontuljati. Drugi korak je da ako imamo neku ideju za ku pensamo da je super, javimo se pročelniku u Županiji direktno, firmama za EU projekte, bankama, nikad se ne zna kadi nan se vrata moru dopriti. Samo nikad nemojmo odustati od svojih snova i ideja.