RIJEČ MLADIH: Jopet smo si sami krivi

Napokon su nan došli ti turisti. Koliko smo hi svi skupa čekali, ti peti misec je bija katastrofa. Ali svi su govorili da će biti bolje. I stvarno je bilo bolje. Kako je počelo lipo teplo i sunce, tako su došli i turisti. Sve je nikako živnulo kad su oni došli, ali iskreno mene su neke brojke hitile u pensire. Oko 20-ak posto, govore svi ča delaju po tin agencijama, da je manji booking za cilu Hrvatsku, nego pasano lito. To bin nan ništo tribalo reći, ako smo dosta pametni i štabeli. Nisu nan ni Turska, ni Grčka krivi, jopet smo si i za ovo sami krivi.

A zašto je to tako? Jer ne nudimo niš osim mora i sunca tin ljudima ča ovamo dojdu, čast izuzecima. Ti brižni turisti se osjećaju prevareno kad dojdu ovamo. Skupi smo, a ljudima malo tega ponudimo. Budimo realni, svašta se iznajmuljuje, svaki pensa da more dobiti šolde jer ima jedan stan ili kakovu kamaru. Ma ne gre to tako, ne more se stan na 8. katu neke zgrade u Šijani iznajmljivati za turiste. Ne postoje laki šoldi, za zaraditi niko šoldo se moramo namučiti ili pametno uložiti. Koliko god bi mi svi stili da niš ne delamo i da dobivamo šolde, to tako ne gre. Za svaku stvar u životu se moramo pomučiti da bimo nakon puno truda dobili ništo nazad.

Moramo svi skupa ponuditi ništo više tin ljudima, neko iskustvo da zapamte to ča su došli ovamo, da hi forši naučimo delati fuže ili pljukance, forši kako se plete, takove če stvari oni zapoštati i ponesti sa sobon doma na 14. kat neke zgrade u Berlinu. Moramo njin ponuditi ono ča oni doma nimaju, ona ča u Njemačkoj, Austriji, Italiji, Češkoj me moru viditi ili naučiti. Takove stvari stvaraju dodatnu vrijednost, tako čemo biti bolji od Grčke i Turske. Istra je tako mala, a tolika bogatstva ima, toliko različite kulture, arhitekture, običaja, moramo najti načina da pokažemo ta naša bogatstva turistima, siguran san da bi oni bili oduševljeni kad bi vidili kako se dela pinca, kako se dela hobotnica pod čeripnjon, kako se sviri roženica, forši bi i balun zaplesali.

Malo pomalo gremo naprid, svako lito se dopre ništo novo, ništo bolje i veće kvalitete. Hoteli po Istri su nan većinom odlični, oni svoje cijene opravdavaju jer nude puno tega, pred par lit su nan se doprla dva aquaparka i to je ono ništo više. Nike općine s vizijon i planom razvoja turizma su se pokrenule i na vrime osmislile glazbene festivale, gastronomske večeri te tako zadržali ljude poli sebe. Moremo i moramo bolje jer će nas konkurencija inače pojisti.

Sada gren i ja delati sa turistima. Malo ću odmoriti od pisanja ali van želin reći da budete pravi prema tin turistima, poštujte he, pokažite njin ništo ča vi doma delate, pokažite njin da Istra merita da se tornaju i drugo lito. Jer kad van se gosti tornaju, onda znate da delate dobro delo. Za drugo lito ćemo svi skupa morati malo kalati cijene da budu realne ili za tu cijenu ponudite ništo više. Ništo po čemu će zapamtiti nas kao domaćina i našu hižu ili apartman. A tako i našu lipu Istru.