Na Cresu

Deboto mi ni bilo za verovati da je Filice reka - vero hote kamo ćete - kad san mu reka da bih par dan poša z famejon tu priku mora na mojoj paroni drag otok Cres. Reka san mu to užbriš dok smo krgali male bale ud sena i ti petak san dela tuta forca da speljemo krmu doma i da na miru moren partiti čja.U subotu zjutra smo se leveli da rivamo na trajekt u jedanajst i po, ma ćeš drek. Kako da ne znamo da je subota gambija gosti, pak smo čekali deboto dvi ure da se nakrgamo na veliki brod, kako ga je zva Frane, aš smo pošli na unega ča pelja sto i šeždeset vitur ki na unega ud šezdeset nismo rivali. Došli smo u Martinščicu u Morisov apartman nidi okoli dvi i po. Parona je bila sva kuntenta aš njoj ti Cres prilipo zadaje. Meni zadaje isto, ma ni važno. Tamo je već bila naša Dada pak mi je spražila kumpiriće, a parona je uzela punjene paprike ke je činila punica da se čujemo kako pravi turišti, aš kakov si ti to turišta ko si ne uzmeš hranu z sobon za sve dane ča ćeš biti tamo. Almeno tako dela savičentinska elita kad gre na snig.Da bin to razbija, druge dane san, kako turizam zapovida, natenta paronu i Dadu da gremo na ribu, magari u glavi mi je bila samo janjetina, ma je nis beka, aš u jenoj oštariji je nisu imali, a u drugoj mi je sam konobar reka da je bolje da ordinan ča drugo. A pensa san da bi rabili biti sakramenski ti creski janjci aš oni ne vide ni šemule ni koncentrat ni trukinju ko ne uno ča najdu na paši. Ukupali smo se tu subotu u Martinščici, ma su mi ben u nedilju dali dela. Da gremo na najliplju plažu, da je ud pijeska pak da te se dica igrati. Ni bila ud pijeska ku ne ud grotic, ma je more dobrih sto metri u pijesku, pak su stešo dica uživala, a boga i ja š njima, ma prvo i pokle san mora propatiti aš san više ud po ure za vraton nosija malo Bartola malo Franu zdolu, a za nazad cilo vrime Bartola. Jeno malo huje nego da san pomoga Filici kopati brajde u anguštu, magari to on ne zove kopati ko ne umišati. Ponediljak smo pošli do Osora ki je meni najdraže misto na Cresu. Unako nidi velik je kako Savičenta, a prilip. Ima mol kadi se vežu manji brodi, zajno je oštarija, dosti kulture, samo za razliku ud Savičente, tamo ljudi kape da je to kultura pak je tende. Hitili smo oko i na Lubenice ke me nisu ništo preveć razveselile, ma paronu i Dadu su, aš su pošle na noge z Vidovići priku vrha do Lubenic. Dica i ja smo pošli z vituron, pak nan ni to bila nika nagrada. U torak smo pošli do Velikega Lošinja ki je mali, i do Malega ki je velik. Malo smo se motali po njima, pošli viti veliku i lipu crikvu ka je činjena na groblju, pak na užinu u Osor, malo se ukupali i nazad, ma vero doma. Još smo malo ubašli Cres grad, poili đelato i via za Savičentu. Četiri dana i tri noći za jenega stočara koliko ćeš dosti. Vi put ni nanki Filice jako zaziva da se movin, aš mi je samen jasno da se rabi moviti. Ovac je za doma bilo koliko ćeš na česti. Valja zajdu pod noć u pašu, pak najdu kakov put kud ne bi smile. Samo ne znan kako, aš ima ništo posebno ča me je oduševilo na ten škoju - to kako ljudi zapiru lise za sobon. Poli nas ta kultura ne ežište. Poli nas već ni ni lis, aš i mi ki imamo krave već ne delamo lise ud jasena, ku ne stavljamo bodljikavu žicu na laz, pak ti je najraj pririžu eli dopru - ma zapru ne nikad, eli ritko kad.