Laki i fameja

Filice je kompena pokle deset dan ča san spelja makinario u ložu kapija ča san to činija i totalno popizdija, tako da smo već jeno par dan ala muta. Danas me se ni bilo volja stati u pet i po pak san produžija do sedme, malo zato ki je nedilja, malo ča san štuf čud tega. Posrka san si kafele z Dejon Pamićen. Drugo ni bilo ninega ki su se pasani dan zavitičali Đani i Kornelija pak je lipi parat njih bija na piru i ni još riva doj na kafe. Kad san doša doma, vidin da mi se prvotelka Beba goni. Kako sad imamo bačića Lakija, kako mu je Frane zdija ime, veza san kaveču Bebi za glavu i partija š njon u Vogardu kadi smo parićali jebarnik za blago. Inšoma, Laki još nima nanki lito dan, ma pokaza se da je ingamba za činiti delo, pak smo skopali jenu škulju po metra – dimboku kvarnar centimetri, da bi se na ve veće krave laglje naprtija. Veza san Bebu mriž dube i Laki ga je z trete uboja. Kuntento san poša doma š njon jušto kad je Filice doša z kafela da vidi ča to ja pametnjaković motan z kravon. - Ča je činija ča? – pita me na trdo Filice. - Je – san mu rišpondija stešo na trdo. To su bile sve beside uvi lipahni nediljni dan. Na užini poli Tereže je stešo bilo malo besid, jedino ča dica čine niki štrmor pak se ne vidi toliko teške arije u primaći. Sestra i kunjado po liti ne užaju doj na užinu aš da njin bude teplo, a i dica su njin već velika pak nevoda Izabela dela, a Danijel zaruži u noćnen životu pak se ne riva zbuditi do podne. Zato dojdu zvečer, jušto da vide ko smo živi i zdravi. Zuz dicu štrmor na užini daje i poljoprivredna emisija ka, mi se forši samo para, diventiva bolja. Zadnje dvi ča san gleda su imale već ud po dobrih primjeri kako se i ud tega more koliko-toliko dobro živiti, a ne samo žalopojke. Poša san nikakor kuntentiji leći z dicon pokle užine, aš san si propensa da forši nis zadnji bedak ki rovari po zemlji. Poklepodne su parona i dica pošli činiti banj, a ja san pok san finija regulati blago taka prikolicu i partija po male bale ud robašpanje aš su se niki oblaki počeli motati kako da će ništo kapnuti. Kad san he dopelja doma, su bili rivali sestra i kunjado i u normalnen svitu bi mi bili dali ruku za raskrgati tih sto bal u štalu, ma njente. Valja nismo normalni svit, aš da smo, bi mi almeno brat poša pomoći, ma ni ča na nj računati pogotovu ne u nedilje. Tako san he najprvo shita z prikolice u štalu, pak skoka u štalu he poslagati, i tako pet puti. I sad dobro to, ma još su kunjado, sestra, mati i baba sidili spod kostanja i zajebavali. - To ti je super za kondiciju, ne rabi da greš na fitnes, podjebava me sestra. - Granica minja, ča ne moreš zvati brata eli Ninku da ti pomoru? Ćeš se ruvinati sam, aš tako je dela i moj brat sam pak sad ne more već, viče Tereža. Ne aš ima blizu devedeset. - Sin moj, ma ja bin ti pomogla da moren, ma čekaj oca, će doj vred, samo da učipka brajde, mučna mi je Đinica. Kunjado je muča, a Tereža rađoniva: - Da je tote Ružica z Beograda, bi bila već u štali i slagala kako je prija dvajset dan dok je tote bila. Ma vako njente! Sam i bog!