Makinario i Tolj

Kako san ima niki dug prema savičentinsken mutaven teatru, u torak san ima napro dela za speljati svo to makinarijo u ložu. Jednobrazni, dvobrazni i trobrazni vrganj, linije za po brajdah, kosu dopija lama, grablje na pase i kad san stija još diške, dasku za ravnati zemlju, vrgnje za činiti brazde za saditi kumpire, uno za rastrisati robašpanju - vidija san da ni kamo š njima aš bi bilo prenapeštano.Inšoma, z nutri me počelo peštati da ništo z tin ordenjen činin, pak kad san to još razdela z Lenićen ki je činija video o temu kako to makinario dela na kampanji i tako smo zaprli štoriju ka mi se veramente pježa. Aš va instalacija je činjena prez provokacije ka je diventala naš kompas i ka ni za hititi čja, ma vako ništo mi je puno sofisticiranije i deboto da su tu večer ti kusi ordenja diventali biti prave umjetničke skulpture.Da ne bude art prez mesa, san speka sto kušeti ud pulaštri, ki su stešo parat ud te štorije aš ideja o ten makinariju u korti prez kokoš ke teču ne bi bila puna, a i ti plesarini imaju štabela kušeta pak nikako kumpanja jeno drugo.Ud svih ki su došli viti to makinario najdraži lik mi je bija drug Tolj, ki je pokle deset lit doša u Savičentu. Zavolija san ga uno prvo lito mutavega teatra kad je činija performans u Žlinji i bija na žiriranju koz ke su to isto lito bile prvi put misice u Žlinji. Lipo smo bili zaružili tu zadnju večer volitnjega teatra i zjada mi se kako i prid deset lit, da je sve pošlo u kapuz, da ga tiraju van z Lazareti, da mu je dosti red karpet kulture i svega temu blizu.Doša je u Savičentu aš je u Poreču izbornik za pedeseto Annale pak san mu ubeća da ću doj viti, magari zuz velike muke aš po liti u Poreč i Rovinj ni vrag lik razumno poj. Turišti pun klinac, gužve, ni kadi frmati vituru, teplo, u jenoj besidi škifo, almeno meni.Ni mi vrag lik bilo ža da san poša na dopiranje Anali. Došli smo par menuti prvo, hitili oko na te angažirane umjetnike i udruge kin je pun kurac Bandića, Keruma, Jakovčića, kriminala i kapitala, na ča je bilosvitski župan Istre popizdija, i kako da je najveći kunsthistoričar reka da je to smeće. Svaka čast, drug Tolj, drito u punto debole. Ni bilo Pikasovih radovi i županu se zamračilo, ča Labrović ki si dere kožu, ča Tanja Dabo, ča Volim Pulu, ča Pravo na grad, ča još z dvajset njih ki kritički pensaju o prostoru i društvu.To je drek, po Ivanu Ninu Prvemu i Zadnjemu. Puka bi valja bija da ni i nas (Šikuti Makine) spomenuja, aš je reka da On, mali bog, daje šolde perfin i nan. Drugin besidami, da nas rabi imedijatamente upuhnuti. Na tu moju izjavu u đornalu popizdija je moj drug Lenić ki pensa kako ja samo ča po njemu z diplomatskih razlogi nis triba tako z žuči reći, aš z tin ne niš gambijivan, a sigur je da će nan župan ukinuti i tu bižonju ku nan daje županija.Škifo mi je va štorija kad moran u nju metati političare, pak namistu da pišen kako je moj Filice zvadija kumpire i falija se po vali mojoj paroni, Dadi i kunjadi Gogi da takovih kumpiri nisu vidili kako ča su vi njigovi štabeli. Eli o mojoj Tereži ka je svakega pasala kroz ruke da vidi ki su za duradu, ki za u gnjoj. Eli o ten kako smo puštili baka pak je zgubija nevinost u torak večer kad je skoka na Marlenu i činija delo, samo ča je još maljahan pak je kako ga je vrga nutri pa na guzicu. To je bilo toliko smišno za viti da se ni tac ni ja nismo nasmijali. Ma kad me veramente vi župan štufa. Deboto dvajset lit vedri i oblači.