Burning Galinjanka

Nanki ni štabelo finila glavna komunska fešta kad san z rana jutra hodija na kafe, još su vi trži borci bauljali po česti iščući auta za poj doma. Popija san kafe i, pur mi je lipo rekla Tereža da ku ni ča da moran pod mus da ne gren, ki je dan bojži, vranić mi ni da mira, poša san balirati.Bija san pokosija unu rapanjaču ku je lipo za viti, ma je škifoža aš ti zatare unu kulturu ku si ti posija. Drugarica rapanjača se jeno deset dan sušila da bih je moga imbalati kako tuka, ki je naresla priku metra i ni teorecke šanse da je makneš z njive dok se ne napro usuši i napensa san je jušto u nedilju imbalati. To je bija najveći žbalj ki san činija.Kampanja na koj san to dela je ud Milana z Pajkovići ki ni riva pobrati grote na njivi pak mi je zadila jena u balirku, pukla kadina i z po bale u balirki partija san doma da to učinimo. Živolić se zajno čepa dela, magari san mu reka da gremo užinati pak ćemo skupa, ma on je stija to zajno regulati i kad se upere i pribuče da mu je nedilja. Ma mu je bila! Poša je puntati niki kus zatezača kadine. Pokle ča smo užinali, lega san z Franon i Bartolon u noninu postelju i ud jedan put čujen da Živolić viče: Daro, Daro, vred!Hitija san se z postelje na barkun i san ima ča viti - voganj u korti! Balirka u plamiku, panika u glavi, tečen doli h njemu, ne znan za ča da se čepan. Živolić z sičon proviva gasiti, ma kako je ta dežgracijana rapanjača čepala deboto kako benzina, to je takalo goriti kako munjeno, a kad su još pasi ud gume čepali, ni već bilo pomoći. Svi su se skočili!Tac ki je bija neverovatno kul, moja sestra i parona su z sići gasile, Živolić z gumon ud vode, ja san poša rastakati Zetora da se ne i on užgije… U pet menuti smo to ugasili, ma pasi ki su glavni prodot na Galinjanki su svi zgorili. Kvarnar i pet malih ud metar i sedandeset i šest velikih ud tri metra, ki po talijanskoj preciji dojdu blizu dva miljara evri, su pošli biti istorija.Tereža ni mogla par ur doj sebi, aš se domislila kad njoj se nažgala kopa, kužina, dimljak na gnjištu. Ni mati ni to lako podnila, aš takova dižgracija je domisli na kvarnar i tretu kad su njin Švabe nažgali hižu i kad su zustali prez ničesa. Ma sad je morala miriti tetu Irmu koj je zajno tlak skoka na dvisto, pak ni toliko pensala na svoje zgorene Šaine. Stešo me par da se najveć prenuja Frane ki je po ure rova da su mu valje žilice na licu zbile van ud straha. Bartolu je to bija kako niki crtani, a Filice ki ni zakleja ni jenega ud zgor, poša je leći z dicon i lipo he umirija.Svi smo se pobrli u hižu počinuti kad je to finilo tinjati, ja san zajno poša na internet baliti ku bih naša kakovu bolju preciju ud talijanskih pasi. I vero san, deboto u po cijene, te iste pase znaju činiti meštri u Križevci, a pokle san vidija da je fabrika i u Sisku i još nikadi. A mi sve uvozimo! Ča ni žalost? Dojde mi za puknuti kad vidin da moremo sve napraviti, samo politika neće da ti to napraviš, oni će uvoz da imaju pedeve i carinu, plus tega i kontrolu uvoza pak ništo i za njihov žep.Poša san z večer na bevutu poli Ferlina da skuliran fajer u tilu i tik-tak smo se našli četiri ud nas i hitili briškulu. Ne užamo u nedilje igrati briškulu, ma mi je legla kako budali triska.