Tako nikako

Napro trdih petnajst dan je uzad mene. Još triba zdurati petnajst do dvajset pak san na konju, eli bolje reći na tovaru. Aš lipa beštija je konj, ma meni je puno bliži tovar. I kosi, i ubrači i grabljaj i baliraj i speljivaj doma bale, i tako svaki dan po trinajst do četrnajst ur na zetoru, na fergusonu pet tri tri eli na ven drugen fergusonu pet tri devet. »Ano di erba, ano di merda« bi bila nika narodna batuda, ma meni već paše da je erbe nego da je ni, aš stešo mi dojde van pameti da erbu kupujen poli naših susedi Talijani.Filici je ništo došlo u križa, pak ne more kopati kako bi on stija, a još san ga ja rabija niki dan kad san ga vidija da gre u vrta po peti put vo lito kopati žbulju. Škopija je i hitija matiku za nami, ma ni bilo dosti force da me dosegne. Par dan nismo kušeljali, ma kako je tu njigova sestra z Beograda, se je rasrdija pak je joped sve po staru, samo zadnje dane nima jako force za ordinivati i biti nervož. Će biti da je pretrudan.Đinica mi je navijena sto na uru, pak dela za sve une dane ča je ležala u marču i avrilu, tako da kad me Filice ne riva da je za upraviti uvo eli uno, je sad Đinica namisto njega.- Daro moj, una želiza z gumna bi bilo lipo da kamo makneš, uni štradun okoli žita rabi pokositi aš ko ne će se tac jaditi... Une krave bi rabilo da ustrigljaš, vidiš da tac ne more, joče mi po noći da ne more ni naprid ni nazad, da mu je teško doj u štalu kad vidi kako su šporke krave…Tereža kako i vajk u svojen filmu. Riva z piki zgoru i zdolu i nikad je nis vidija da gre van hiže eli u nju praznih ruku eli da ne brana ča u traverši. Eli daščice za staknuti špaher, eli kakovu padelu, eli dva kumpira, tri žbulje. Pur njoj rečen da mi reče da ću njoj ja donesti, ma ben san pokle kapija da to čini sporadi sebe, natirati se delati da ti je laglje bol potrpiti, aš zaisto je noge bole za popizditi, a i niko lito su činile. Ma kako bi rekla ona: dok se movin je dobro, aš kad ne, će biti grave.Živolić me napro šalviva ve košnje. Još pok smo uzeli novu gašpardovicu ka brije kako bricina britva, ne kaliva se š nje, samo ča se je i njemu počelo kapitati da ča prekine, pak mora i kositi i načinjati, a ja mu rad rinen grablje da gre ča i pograbljati pak ga vidiš rabijan.Brat me ne jebe dva posto. Valje valje će dopriti servis ud bičiklet, aš zadnje vrime ima posla samo š njima, najde kakovu ka ne valja, ripašiva je i prodaje. Fali se da mu gre, ma meni ne pomore, a da ne rečen ocu u brajdi i matiki.Parona i dica su za pet, samo ča mi je ve zadnje dane škole malo napeta kako puška, ma još par dan pak gredu dica na ferije i stvari će se kalmati.Na kafelu poli Ferlina buden napro kratko, aš ni lazno. Stešo vajk hitin besidu z Dinon Šainkinin i Dejon Pamićen, a i Zoki mi vajk voli niku novu povidati, ko niš drugo povi kako mu je pasala noć u Kontejneri kadi dela kako stražar, pak je kad i ja, u sedan i ča u lokalu na svojen ritualu.