Fakofbolan

Finalmente je i sunce zasvitlilo u maju misecu. Magari smo ga po pasali, pena tega jutra zrana na kafelu mi ni bilo friško. U jaketi za proliće, prvi put ud kad moran fumati na teraci, lipo san se čuja. Kuraj mi je doša delati Dejo Pamić u kratkih rukavi aš tobože je on teple bezačke krvi, a kuntenstvo su mi donili braća Grim ke nis vidija cilih lito dan, ud kad su mi finili zid. Z sobon su donili i unu zdravu bezačku zajebanciju pak mi je sve skupa bilo nikako prilipo kafelati. Doša je pak drug Keber ki he zajno počeja cakati da mu pušta krov, pak Fredo ki da i njemu ništo pušta, a da ne pušta samo dvin, je doša i Mario Ferlin samo ku bi mu mogli jeno dva-tri žlipca gambijati.Preveć dažda je napadalo pak je sve počelo puštati, a štabelih meštri je malo, pak va braća imaju dela koliko njin srce rabi. Nisu se ubećali nanka jenemu ud njih aš plove za Štinjan kadi već par miseci delaju, a pokle će morati početi kositi ki jedan drži par krav, a drugi brat ki drži čele mora početi delati med, pak zidarija u vima miseci pada u drugi plan. Zaisto da će gledati regulati tih par žlipci, ma ne se zaliću z promeši da će. Posrkali smo kafele i via svaki za svojin, samo ja nis zna za čin. Filice govori da još ne kositi aš da su do nedilje dali nevrime. I zaspravlje, vreda se joped zaškurilo pak smo napensali, zapravo parona je napensala da gremo z dicon u čine. I smo partili! Lipo smo konšumali crtani, dica su uživala, a vero i mi š njima. Pošli smo pak poli punice ka je prontala sakramensku užinu i lipo nakrmljen hitija san se na kauč da počinen prija nego partin doma u štalu. Parona je napensala da bi se pofrmala u Puli ki bi pošla do preteljice Dušice ki njoj je Lara imala rođendan pak da njoj ponese niku pikulecu, pak da bi rad poj gledati Robin Huda pak da pokle štale dotečen joped u Pulu ki da njoj se para bi moga biti zanimljiv film, a i pokle da njoj sviri preteja u Povijesnen muzeju u programu za noć muzeja, a dica da bi spala poli babe... Dva put u isten danu poj z Savičente u Pulu mi je nikakor preveć, ma vrime je nikakovo, vajk san doma pak san njoj poša na ruku.Film o čoviku ki je uzima ud bogatih i dava siromahon, ni bija slab, ma ni ni ki zna ča. U desetoj uri smo natentali paronu da prije končerta pofrma da Dada, ka je bila z nas u čine i je je navrnula glad, pojde poisti niku škifecu z mekdonaldsa. Da san njoj i ja ruku i ni nanka bila tako škifo ta salama ud pulaštra. Malo poduprti smo se dali zgoru na Kašteja kadi je bila moštra ud starih kompjutori, a za tin i končerto i meni dragih Fak of bolani, ki Deju bubnjara i Šapu kantadura poznan. Parona mi se je tornala deboto dvajset lit nazad. Guštali smo gledati kako je ta mladetina napaljena na pank, kako kantaju i znaju sve beside, kako se hitaju na svaku kantu i kako njin ne premi ni daž ni vitar.Vajk me takne jenu kapljicu ti pank z nutri, zajno mi bolje počme teći krv po žilah. I drago mi je da je tako, magari, bi reka uni, da ni ča biti panker pokle dvajset i kakove, aš sva filozofija panka pade u vodu. Stešo mi je drago da ežište, aš šperan da forši neće jušto svi mladi poj štorto, kako ča nas većina pojde, kad dojdu uni takozvani problemi: krediti, hiža, dica, delo, e četera e četera.