Plufizam

Na kafelu poli Ferlina u subotnje prvomajsko jutro Sipke povida kako mu je bilo pasanu noć na najvećoj fešti ud vina u Hrvackoj. Ni za verovati, ma to je u Istri, u Poreču. - Peko moj, to ti je sve pošlo u kapuz, jadi mi se Sipke, a ni nadut kako bi rabija biti.- Boga Mario i ja zato već tri eli četiri lita ne gremo tamo.- Znan, stešo ja vajk pensan da bi rabilo biti kako tuka, ma to je došlo biti prelušo.- To ti se po domaću reče baz off, pa mi je bija na pamet citat z Đarmušovega filma.Z tin baz offon san pomalo poša doma čekati desetu uru za kad smo se Dino, Rino i ja vrgli dakordo da gremo u Limski kana na svitsko prvenstvo u plufizmu. Inšoma, ni sam nis zna ča će to biti, ma kad te Trananaj zove, to se ne smi udbiti, ki ti čovik ima neopisiv broj originalnih idej. U deset i po smo se našli sprid Kaštela i, kako je grdo poj prez četrtega, smo zvali Điđija i vija mi za zdolu u Rininen automatiku z šiberon.Dok smo čekali inicio, Điđi, ki kako i moj folski preteja ima gripu u črivi, da bi ča poija, pak smo malo ćavapi i kotuleti zamezili svi, da ne ide sam ki ga je sram. Dobili smo biljete na kin je pisalo Plufista broj 18, 19 i 20 i pošli poli mora hitati grote u nj. Mi smo branili boje Šikuti makin. Điđi ni stija aš je u duši komuništa, a po Trananaju vi hepening je bija oslobađanje od svih izmi. Primitivizam, kmetizam, feudalizam, rasizam, boljševizam, socijalizam, komunizam, kapitalizam, neoliberalizam, anarhizam i ini izam bi tribalo potopiti u plitko more, a plufizam bi rabija biti novi svitski pensir.Samo natjecanje je pasalo deboto u velikin neredima, kako partida mriž Dinama i Hajduka, aš je neutralni sudac, ki je ocjenjiva od nule do sto, da deboto najveći broj bodi Trananaju ki je glavni plufista pak je dobija visoke punte, priku osandeset. Situaciju je pod kraj spasija mladić čigova je grota načinila najveći pluf, a ni mi nismo bili za hititi čja aš smo plufirali okolo šeždeset punti. Od većih batic na plufu su bili šef županovega gabineta, prvi friški socijalac Istre, rožen u Savičenti i načelnik komuna ken pripada prvi kus Limskega kanala kadi smo hitali grote u more, ki je dobija nula punti, aš je stija ispolitizirati hepening u smislu da reče koliko Županija daje šoldi komunu kanfanarsken. Kad smo finili plufirati, napro smo se poduprli z meson ud janjca i pedoči ki još nisu bili puni kako tuka, ma svejeno dobri. Sideći u hladu za bankon punin svega, lipo smo juštali novi svitski poredak u ken ne bude bogatih i siromahih, nego samo plufisti, plafisti, plopisti.Za doma smo se još frmali popiti kafe u Kanfanaru u Lipoj i grdoj oštariji, ki se rabilo malo kalmati aš me brat par puti zva da se movin ki bi rad da uzidamo zid poli hižu. Ubeća san mu da san u po ure za podne doma, a on je umiša meltu i pak se dobrahno strdla dok san riva. Stešo san zvuka niku forcu, ne znan z kud, i do sedme ure, bloket po bloket, pomalo uzida to ča smo napensali. Živija plufizam!