Tvor, tor eli diblja mačka

Kako nina beštija san se čuja vega avrilskega jutra na kafelu poli Ferlina. Faking tabako morning na teraci. Vitar puše, pađine biže, a još me uni znutri zajebavaju, a… Joped je doša na snagu antitabako zakon i sad vi ki ne fumaju nutri side u teploj i čistoj ariji, a ja, državni neprijatelj z tabakon u usti, fumaj, ma fora. Ni bed, fumati ću i vani samo da mi vitar ne ubraća pađine đornala, ma i on se urotija proti mene, pak ne da mira. A i kako da bi nike kapljice i prefriško je za štajun. Bija san trd i nis se da, u inat miništru ud muškoli i forcen vitru.Stešo kad pogledan okoli sebe, osin Zokija i mene, z jutra na kafelu ne fuma nidan, tako da su i Dino i Điđi i Dejo Pamić i Mario oštar i Đani osuđeni na naš tabako vonj, a sad komplitli diferent, oni lipo u teplen i čisten ča tribaju zafaliti miništru kontra zdravlja i evropskoj ekokadilnici. Ma neka in bude. Inšoma, čovik je takova beštija da more zdurati svakakove ufeže pak ćemo podnesti i uvu.Mati me zove na telefonin da se vred levan doma aš da je dežastvo na gumnu. Ni mi stila reći eli je kakova krava pošla remengo eli kakov telac se razveza pak činija čine po štali i guvnu, ma kad san doša doma i vidija pod pristrihon i okoli njega dvanajst zaklanih kokoš, mi je bilo jasno da nas je lipa dežgracija noćas kapitala.Pitan mater da ki vrag je to bija da je takov masakr činija, ma da ni sigura - za' da će biti una mala beštija ka se rine svakamor, ma da mu se ne more domisliti imena. Da su i teti Idi prija dva lita desetak kokoš zaklali i ćeš viti da je to uni tvor. Ki vrajži tvor, pitan je ki još nis nikad čuja za tu beštiju, da je lisica, eli ka druga dibljač.- Ma to ti je šegavo kako lisica, puti me mati, samo ča je malo kako štafurač.Ni mi hodilo u glavu da takov kažin nis čuja po noći aš nisu tako daleko od hiže. To je moralo biti patimenstvo za kokoše. Perja nanoge i podnoge, sve zvrnuto šotošora. I velikega peteha je to niš zgrabilo zavrat i zaklalo ga. Nike su ušle vanka, ma ni njin ni bilo pomoći. Mora da je napro žgaj. Ud petnajst kokoš, samo četiri su preživile blic krig malega tvora.Poša san doma to špjegati paroni i punici, ke su zustale u šoku. Hitija san se na internet da vidin kako ti vrag zgleda i kad san vidija da je to veliko niš ki najveć more pezati kilu i po i biti dug petnajst centimetri, mi je pa mrak na oči.Stešo nis nideri naša da je ta beštija vampir. Aš tin brižnin kokošan on ni niš drugo poija ni taka ko ne vrat. I ča dvanajst kokoš mu je rabilo da se nacika za tu noć? Ča jena mu ne bi bila uperala? Niš mi ne gre u glavu, pak gren čuti ča ima Tereža za reći o toj beštiji. Filice ni jako da bado temu aš je naumija delati drugi zid ud korte ki mu je još Sanader počeja tornivati penziju pak sad rivamo po zidi.- Granica minja, si vidija ko slabo nas je zadesilo? - zajno, kad me vidila na vrati, je zajokala Tereža. - Takova škoda u jenu noć! Ma kompena su bile počele štabelo nesti, a prikučera san rekla tvojoj materi neka dvi-tri da za juhu, ma ni rivala. Je ben va diblja mačka učinila delo. Svejeno paran da bi he mogli uguliti i spraviti. Tr se domišljan da je, još dok san bila doma, to učinilo. Moj pokojni tac pak he ni stija isti kako ni ti, ma je vetrinar ben poša he udkopati i uza he da he poji. Alora vero bite i vi mogli.- Živolić he je već zagrnuja, tac je reka da he ne ide, ja neću. Ma ča ti njin rečeš diblja mačka?- Ma ča porta kako njin rečen? Tor, eli diblja mačka, svejeno. Prokleta beštija je i bog.