Hana

Još mi se ni trefilo da tako emocionalno propaden sporadi jene krave. Tega jutra kad san za zadnji put pomuza kravu z najvećima rogi u mojoj štali, pasali su me niki trnci po štumigu – malo preveć san počeja pensati o temu da ki san to ja da iman takovu moć da prisudin nikoj beštiji kad će finiti dihati. U ten hipu mi je kroz glavu pasa senjor Korado Korlević ki je reka da smo u krmnoj piramidi mi zgor beštij pak mi idemo krave, a da je drugajče, bi one ile nas.Sve mi je to jasno, ma nike pute te vero to dotuče i počmeš ne stijuć pensati o smislu svojega bitka, o dosti tega ča delamo samo kako bi nan bilo bolje, a prez da pensamo o ten ča ta druga beštija pensa. Sve ima svoj kraj, tako i moja Hana ima svoj kraj – finiti u pijatu, a ko niš drugo, je finila trpiti mene i moj egoistički mod držanja krav kako roboti.Ni mi bilo tega jutra, prija nego smo je popeljali u klaonicu, nanki kafe gušt popiti, magari su svi moji pretelji z kafela bili kurajni. Dino da gre variti niku prikolicu, Dejo da pituriva kako nikad, Pere grobar je kuntenat aš je daž, pak nima jako ča za delati, a Mario Ferlin se kapljicu refa, ki je već deboto misec dan ništo prehlažen. Điđi i Đani za malin bankon do nas side i zajno ništo zajebavaju, eli da je država u kapuzu, eli da je Glas Istre poša na ocat, eli da smo dobro roblje, eli da župana triba hitno preseliti u Iran kadi će tabakini z Rovinja delati fabriku, eli da penzije već ne bude, eli sve ništo tako. Mi njin dajemo kuraja u ten pensiru, ma koliko vidin, nas par ima napro dela, pak ni ne rivaš preveć pensati o toj njihovoj zajebanciji. Movija san se doma, vrga Hani špag za roge, potegli smo je u kamion i via š njon u maceja. Malo se bunila za poj u kamion, ma ne preveć, verovatno zato ki se drugi put pelje na isten, aš prvi put je je ti isti dopelja z Novaki blizu Oprtlja kadi smo je Filice i ja juštali prija sedan lit još dok je bila junica, ma u drugen stanju. Forši si je propensala da gre poli kega drugega gospodara, pak se ni jako natizala s nas za poj na kamion, aš nike druge te veramente zmuče dok he nakrgaš. Vred smo došli do Trošti kadi se sad kolje najveći broj blaga okoli Pazinštine pak sve do Pule, raskrgali je, dali harte di indentita i za tri dana, kad njoj čine nalaz eli ima uno ludilo, dojdi si po meso.Te dane san se vero čuja nikako. Samo debuleca je vladala z nami i nikakov kuraj nis moga naj. Magari mi se je već dobrih trefilo – i parona se dobro rikuperala i mati se levala z postelje i mliko su nan digli (malo, ma su) i dica su mi dobro – sve ono ča je meni blizu je dobro, a ja ne moren naprid. Napro me zmučija ti Hanin funera, koliko se domišljan, još me jedino tako mučilo kad je tac ubija janjca kega san si na dudu zgoija kad san ima pet lit. Jušto mi to povida mati, kako san tri dana rulija za tin janjcon i da nisu znali ča s nami delati koliko san bija žalosan. Ma sad he iman trideset već, pak mi je joped frka.Stešo mi se kapljicu Hanin duh osvetija. U subotu smo, da ne zabimo kako su nan une večeri Gril pisa bile lipe, činili večeru poli Ferlina. Uvu subotu ćemo početi joped, pak da vidimo eli su ti kuhari na visini, san regala Hanin biftek ki su ž njin činili tartar, a trobu su ubraćali na gradelah. Sve je bilo za prste polizati, ma me ben pokle u ponoći natiralo da sam z sobon gren u noćno ludilo. Uputija san se najprvo u Orbano, žminjski elitni bar. Kako se tamo nis naša, a špjegali su mi da dela kultni Magnus, poša san tamo, ma mira ni. Gren dalje u Merikane, noćni bar z živon mužikon ka i ni tako slaba, ma me tira čja i namistu da zavijen u kortu, via ja u Klariće – oštarija za isti zuz niki trio eli duo plesnjak. Trizan čovik to si ne bi dopuštija, ali Hanino meso mi ni dalo mira. Nedilja, ponediljak i utorak, ne bolan, nego remengan.