Parona u špitalu, Tamara u oštariji, tripe al dente

Teška šetimana je uzad mene. Parona mi je bila cilu šetimanu u špitalu. Pošla je zaciliti rane ud dva gnjusa, ki su oba roženi carski, a najveć zato ča su zašli na svit već veramente zgojeni, kako petkilaši. Ti beati bruh je doša biti sad o pak, pak je parona rekla sad da ne mora pak, i via ona u špita da njoj pomoru.Ni to nika ki zna ča teška operacija, ma joped je, i vero san si jeno malo patija š njon. Nis njoj to pokaziva, ma lipo me je greblo u gutu i stiskalo okoli srca. Z mojin Franon san je hodija vižitivati svaki dan, a doma je red držala punica. Bartola nismo stili peljati, ni jako skaživa intereš za poj u špita kamo je, kako je govorija, mama pošla vaditi kuv. Bi reći da mu je namistu matere doma bila baba pak mu je to došlo biti isto, jedino je konpena prija desetak dan finija cikati, pak ga je, kako mi punica povida, ćepala kriza i pita je nju ko ima malo mlika.Zasvin ki je bolilo, paroni ni bilo teško ležati u špitalu ki je imala super sestre i jenega brata ki su je tendili bogovski i govori da he rabi pofaliti do neba. Jedino na ča se požalila je zahod ki je bija maša largo ud kamare. Zahod na početku, a njoja kamara na kraju hodnika pak da njoj se paralo da ima poj ud doma do Brićanci za poj pišati.Meni je bila malo muka pasati po hodniku poli ti zahod na drugen katu abdomene, kadi san prija tri miseca dobija purge i patija kako beštija, pak san zauza da je katastrofa ti kus špitala, ma kad san sad malo u tih sedan dan bolje pogleda kako zgleda sve skupa, i kamare, i zahodi, i sestre, i medigi, vidin da i ni tako slabo. Ljudi se vajk tuže da nan je špita brižan, ma ja se z tin nebin složija. Nu, bi moglo malo bolje, ma ni vako ni slabo.Jenu kapljicu mi je bilo ža da se ta njoja operacija poklopila z Tamaron Obrovac ka je pasanu subotu došla ćakulati z nas u oštariju poli Ferlina u sklopu Gril pisa. Jako je štima pak bi bila rad čuti ča će reći, ne samo o mužiki ku dela sakramenski, ko ne i o ten ča pensa z Domon ki bi se i ona rad infetati da z dicon dela kakove predstave i druge slične prodote.A nan je z Tamaron bilo lipo. Mario Benčić je je šeka da malo povida ud kraja, pak smo čuli sve o ten kako se infišala u džez. Ni ni teško, aš po geni njoj je već bilo usaženo to ništo z umjetnosti ki njoj je tac legendarni profešur ud pituri i sam artišta, pak ni imala kamo zabrazditi drugamo ko ne u takov art. Tako da i ona ima ti problem da njoj ni dosti samo kantati i delati mužiku za kazalište i film, ko ne je počela mučiti i Savičenta.Stila bi u Domu delati kulturne programe, i ne samo to, ko ne he i proizvoditi. E to njoj je jeno malo veći problem nego dobiti nagradu ud Bi Bi Sija. Koliko je trdoglava, bi i mogla ča učiniti, ma ja san, bi rekli Hrvati, preveć skeptičan. Tu večer san njoj špjega da njoj je najveći saveznik moja parona, i da ne vidin druge peršone ka bi se dala u to, a sam ću pomoći koliko buden moga.Sve je tu subotu večer u oštariji poli Marija Ferlina pasalo u redu i Tamara i mužika, ki su po prvi put mriž narod se upuštile kantati Marlena ud Šilije i Bojana ud Labina. Samo ča nan tripe nisu pošle kako tuka. Inšoma, Dino, Rino i Šeki su provali sve i svašta da bi te tripe pošle h križu, ma nikakor. Trde su bile i nikako se skuhati, a kuhali su he priku četiri ure. Rekli su mi da san ja kriv, aš da su mi uvalili tripe ud slona, ma i da su ud slona bi se u četire ure umekšale. Pur ne da se branin, ma su mi rekli da su juneće u bekariji kadi san he uza.- E, moj Peko, tebe svaki more za blago držati – san čuja kad san njin to reka. Tu večer he nismo ili, ma smo ben u nedilju jutro marendali bogovske tripe al dente.